Herdu encûmenên xwecihî yên Hesekê yên Encûmena Niştimanî ya Kurdî li Sûriyê (ENKS), lîstikvanên Akademiya Bazên Taekwondo xelat kirin.
Ev xelatkirin wekî rêzgirtinekê ji bo serkeftina werzîşî ya ku di Qehremaniya Komarê de bi dest xistine, bi amadebûna hejmarek werzîşvan û kesên eleqedar ên warê werzîşê pêk hat.
Ev xelatkirin piştî encamên berbiçav ên ku lîstikvanên Akademiya Navneteweyî ya Bazên Taekwondo û Dibistana Navneteweyî ya Daydo di beşdariya xwe ya hevbeş a di Qehremaniya Komarê ya Taekwondo de bi dest xistine, hat.
Qehremanî li paytext Şamê bi beşdariya 38 tîm û 365 lîstikvanan ji parêzgehên cuda yên Sûriyê birêve çûbû.
Rêveberê akademiyê, Kapten Nazim Ehmo ragihand ku lîstikvanên herdu dibistanan karîn 18 madalyayên curbicur bi dest bixin; ew jî 4 madalyayên zêr, 2 madalyayên zîv û 12 madalyayên bronz in.
Bi van encaman, wan di asta şitlan (beraîm) de pileya yekem, di asta biçûkan de pileya sêyem û di rêzbendiya giştî ya qehremaniyê de jî pileya sêyem bi dest xistin.
Di dema merasîma xelatkirinê de, herdu encûmenên xwecihî yên ENKS’ê mertaleke rêzgirtinê pêşkêşî akademiyê kirin wekî nirxandinekê ji bo ked û destkeftên wê yên werzîşî.
Ji aliyê xwe ve, akademiyê jî mertalek pêşkêşî Encûmena Niştimanî ya Kurdî kir wekî spasdariyekê ji bo vê destpêşxeriyê.
Ev xelatkirin di çarçoveya piştgirîkirina behremendên werzîşî yên ciwan, handana serkeftinên navxweyî û ronîkirina şiyanên hêvîbexş ên ku navê Hesekê di qadên werzîşî de li ser asta Sûriyê bilind dikin, tê.
Ragihandina ENKSê
Rapor : Elî Fetah



