Encûmena Niştimanî ya Kurdî li Sûriyê (ENKS), îro Yekşemê 8ê Mijdara 2026an, bi merasîmeke berfireh ofîsa xwe li bajarê Helebê bi fermî vekir.
Merasîma vekirinê piştî temamkirina hemû amadekariyên pêwîst, bi amadebûna Serokê ENKSê Mihemed Îsmaîl, Mamoste Ebdulbarî Xelef, Serokê Encûmena Xwecihî ya Helebê Mamoste Mislim Mihemed û hejmarek kesayetên siyasî, rewşenbîr, civakî, li gel endam, berpirs û alîgirên Encûmenê birêve çû.
Beşdarî û Gotarên Merasîmê
Di merasîmê de nûnerên hikûmî û kesayetên siyasî, civakî û çandî amade bûn.
Ev gav di çarçoveya hewlên ENKSê de tê ji bo xurtkirina hebûna xwe ya siyasî û rêxistinî li bajarê Helebê û berfirehkirina qada karê xwe.
Di rûniştina vekirinê de ev gotar hatin pêşkêşkirin:
• Mamoste Mihemed Îsmaîl – Serokê Encûmena Niştimanî ya Kurdî li Sûriyê (ENKS)
• Mamoste Mislim Mihemed – Serokê Encûmena Xwecihî ya ENKSê li Helebê
• Dr. Usame Mislim – Kesayetê siyasî
• Hemûd Ebû Zeyneb – Serokê Koma Duyem li Parêzgeha Helebê
• Dr. Ehmed Remezan – Serokê Tevgera Karê Niştimanî
• Harûn Osman
• Ehmed Hesen
Her wiha di merasîmê de birûskên pîrozbahiyê yên Hevserokatiya ENKSê, Mamoste Behcet Beşîr û Mamoste Tahir Sifûk, hatin xwendin.
Xizmetkirina Hemû Pêkhateyan
Li gorî daxuyaniya berpirsên ofîsê, ofîsa ENKSê ya li Helebê ji îro pê ve ji bo pêşwazîkirin û pêşkêşkirina xizmetguzariyan ji welatiyên Kurd û hemû pêkhateyên din ên bajêr re vekirî ye.
Di vê çarçoveyê de, Serokê ENKSê Mihemed Îsmaîl tekez kir ku vekirina ofîsa Helebê beşek e ji hewlên berdewam ji bo pêşxistina jiyana siyasî, xurtkirina karê niştimanî û aktîvkirina rola Encûmenê di xizmetkirina welatiyan de.
Berfirehkirina Tora Rêxistinî
Vekirina vê ofîsê di çarçoveya belavbûna ofîsên ENKSê li piraniya bajarên Kurdî û her wiha bajarên Şam û Helebê de tê.
Ev ofîs kar dikin ji bo danûstandina ligel hemû pêkhateyan, bihêzkirina hebûna Encûmenê û pêwendiya rasterast ligel hemû beşên civakê, bi taybetî li bajarên ku xwedî pirrengiya niştecîbûn û çandî ne wekî Helebê.
Di dawiya merasîmê de, Mamoste Mislim Mihemed spasiya hemû amadebûyan kir û bal kişand ser girîngiya parastina aştiya civakî, xurtkirina pêkvejiyana hevbeş di navbera hemû pêkhateyên gelê Sûriyeyê de û rola dewletê di avakirina aştiyê de.
Ragihandina ENKSê
Rapor Elî Fetah
