QAMIŞLO – Îro 15 sal di ser şehadeta her du têkoşerên azadiyê, Cemal Huseyn û Hesen Mistefa re derbas dibin.
Her du şehîd di sala 2011’an de, ji aliyê hêzên rejîma Baas ve li bajarê Qamişlo, di dema oxarkirina cenazeyê şehîd Mişel Temo de hatin şehîdkirin.
Ev bûyer wekî yek ji girîngtirîn qonaxên hevgirtin û berxwedana gelê Kurd li dijî zilm û zordariyê tê naskirin.
Merasîma oxarkirinê veguherî xwenîşandaneke girseyî û dîrokî.
Bi hezaran şêniyên Qamişlo û deverên cuda yên Rojavayê Kurdistanê, tevî kesayetên siyasî, rewşenbîr, akademîsyen û nûnerên saziyên sivîl beşdarî merasîmê bûn.
Tevlîbûna gel nîşaneya biryardariya li ser şopa azadiyê û domandina rêya şehîdan bû.
Di merasîmê de, li ser navê kesayetên neteweyî û rewşenbîrî axaftin hatin kirin.
Di axaftinan de hat destnîşankirin ku xwîna şehîdan rûmeta gelan ava dike û şehadeta Cemal Hisên û hevalê wî Hesen Mistefa bûye sembola herdemî ya qurbanîdan û dilsoziya bi doza azadî û edaletê re.
Têkoşer Cemal Hisên ku bavê şeş zarokan bû, tevî hevalê xwe Hesen Mistefa yê ji taxa Qudurbeg ku ew jî bavê sê zarokan bû, hatin gulebarankirin.
Hêzên rejîmê rasterast gule li girseya gel reşandin, ya ku bi awayekî aştiyane li dijî siyaseta terorkirina şehîd Mişel Temo hêrsa xwe nîşan dida.
Şehadeta her du têkoşeran guhertineke dîrokî di hişmendiya civakî ya Kurdî de çêkir û wateya berxwedan û rawestîna li dijî sitemkariyê di bîra gelê Qamişlo de çand.
Her du şehîd wekî du sembolên nemir man ku vîna jiyan û azadiyê li hemberî mirin û zilmê nûner dikin.
Ragihandina ENKSê
Rapor:Elî Fetah