Bi hatina demsala zivistanê û daketina pileyên germahiyê li bajarê Hesekê, êş û azarên welatiyan di peydakirina pêdiviyên germkirinê de zêde dibin.
Ev yek di demekê de tê ku gazind ji nebûna mazota germkirinê û bilindbûna bihayê wê hene, li kêleka bilindbûna bihayê mazota azad, kêmbûna demjimêrên kehrebeyê û bihabûna nirxê abonetiyê di jeneratorên kehrebeyê de.
Welatiyê bi navê Mihemed Xelîl di daxuyaniyekê de ji bo malpera Encûmena Niştîmanî ya Kurdî li Sûriyê (ENKS) ragihand ku wî îsal sobeya mazotê dananiye, ji ber ku ew nikare şewatê di bin siya bihabûna wan de bikire.
Xelîl da zanîn ku karê wî wekî karker di kargeheke çêkirina blokan de dahateke têrker ji bo dabînkirina pêdiviyên sereke yên malbata wî peyda nake.
Xelîl her wiha diyar kir ku mûçeyê wî bi zorê têra xerciyên malê dike û rê nade ku ew kartên kehrebeyê bikire yan jî rêjeya pêwîst a mazotê ji bo germkirinê dabîn bike, ev yek jî wî bi dijwarbûna pêla sermayê re dixe ber bijardeyên zehmet.
Ji aliyê xwe ve, welatiyê bi navê Dilşad Reşîd bang li aliyên peywendîdar kir ku di bihayê mazota germkirinê de lêvegerê bikin û di belavkirina wê li ser welatiyan de lezê bikin. Reşîd tekez kir ku sermaya Hesekê bi dijwariya xwe tê naskirin û berdewamiya krîza germkirinê êşa malbatan girantir dike, bi taybetî ew malbatên ku nexweş, kesên temenmezin û zarok di nav wan de hene.
Krîza germkirinê li bajarê Hesekê bi hatina her zivistanekê re nû dibe û careke din ronahiyê dixe ser rewşa dijwar a jiyanê ya ku welatî rûbirûyê wê dibin, di nav daxwazên girtina rêkarên bilez de ji bo dabînkirina şewatê bi bihayên ku bi hêza kirînê ya welatiyan re biguncin, da ku êşa malbatan kêm bibe û wan ji dijwariya sermayê biparêze.
Ragihandina ENKSê
Rapor Elî Fetah
