ZIMANÊ KURDÎ Û MIFREDAT DI PARLEMENA SÛRIYÊ DE HATIN GOTÛBÊJKIRIN
ŞAM – Di rûniştina fermî ya Encûmena Gel a Sûriyê (Parlemen) de ku îro, Duşememê 14ê Îlona 2026an, li paytext Şamê hat lidarxistin, dosyeya zimanê kurdî û mifredatên perwerdehiyê bi awayekî berfireh hat nîqaşkirin.
Di vê rûniştina ku taybet bû ji bo guhdarîkirina li wezîrê perwerdehiyê, her du parlamenterên kurd Fesla Yûsif (li ser parêzgeha Hesekê) û Ridwan Seydo (li ser devera Qamişlo), daxwaz û girîngtirîn dozên girêdayî mafên perwerdehiya kurdî bi fermî
raberî wezîr kirin.
Xal û daxwazên herî girîng ku ji hêla her du parlamenteran ve di vê rûniştinê de hatin pêşkêşkirin ev in:
Daxwazên parlamenter Fesla Yûsif:
* Perwerdehiya bi zimanê dayikê: Teqezkirina li ser mafê xwendekarên kurd ku bi zimanê xwe yê dayikê bi fermî perwerdehiyê bibînin.
* Sazîkirina perwerdehiya kurdî: Daxwaza dîtina formuleke perwerdehiyê ya zelal û domdar daku zimanê kurdî di nav sîstema perwerdehiya fermî ya welat de cih bigire.
* Redkirina çareseriyên demkî: Balkişandina ser pêwîstiya danîna çareseriyên bingehîn û herdemî ku li gorî rastiya herêmên kurdî bin, li şûna pêngavên demkî.
Daxwazên parlamenter Ridwan Seydo:
* Mifredatên “Rêveberiya Xweser”: Raberkirina rasterast a pirsgirêka xwendekarên ku di salên borî de li gorî mifredatên Rêveberiya Xweser bi zimanê kurdî xwendine.
* Zehmetiyên veguhastinê: Ronahîxistina ser astengiyên mezin ku rastî van xwendekaran tên dema ku dixwazin derbasî mifredata fermî ya hikûmetê bibin.
* Parastina paşeroja xwendinê: Daxwaza afirandina qonaxeke veguhastinê ya zelal û çareseriyên nerm daku salên xwendina xwendekaran biparêze, bêyî ku neçar bibin ji sifirê dest pê bikin.
Bersiv û helwesta Wezîrê Perwerdehiyê:
Di bersava xwe ya li ser daxwaz û pirsên parlamenterên kurd de, Wezîrê Perwerdehiyê yê Sûriyê bal kişand ser plan û gavên wezaretê yên di vî warî de û ev xalên lî jêr ragihandin:
* Sîstema perwerdehiyê ya nû û guhertin:
Wezîr diyar kir ku wezaretê berî şeş mehan pîvanên neteweyî yên ji bo avakirina mifredatên nû bi dawî kirine, û niha ev pîvan li pêşberî encûmenê ne daku werin pejirandin, piştî wê weşandina pirtûk û mifredatên nû dê dest pê bike.
* Plana rûbirûbûnê ya lezgîn û stratejîk: Wezîr teqez kir ku wezaret li gorî du planan kar dike; planeke lezgîn (emergensî) ji bo dabînkirina mafê xwendinê ji bo her zarokekî, û planeke stratejîk ji bo pêşxistina sîstema perwerdehiyê bi awayekî ku li gorî guhertinên nû be û dadperweriyê pêk bîne.
* Çareserkirina pirsên derbasbûnê: Li ser dosyeya xwendekarên ku li herêmên kurdî xwendine, wezîr amaje kir ku sîstema hevsengkirina şehadeyan (muadele) niha bi tevahî bûye elektronî daku karên xwendekaran hêsantir bibin, û wezaret amade ye li ser çareseriyên nerm bixebite da ku paşeroja perwerdehiyê ya xwendekaran neyê windakirin û astengiyên rûbirûyî wan werin kêmkirin.
Ragihandina ENKSê
Rapor : Elî Fetah