Di dema ku em ketine destpêka meha Tîrmehê de, tevî daxuyaniyên Cîgirê Parêzgarê Hesekê û berdevkê tîma pêwendîdar Ehmed Hilalî, yên ku soz dabûn di destpêka vê mehê de û piştî bidawîbûna çaksazkirin û sererastkirina tora elektrîkê dest bi kişandina avê bikin, hîn jî ava vexwarinê li bajarê Hesekê û gundewarên wê nagihîje welatiyan.
Di demekê de ku xelk li benda vegerandina avê bûn, jêderên agahdar dan xuyakirin ku rawestgeha “Elûk” di heyama dawî de rastî operasyonên sabotaj û talankirinê yên berfireh hatiye. Ev binpêkirin bandoreke neyînî li alavên bingehîn kiriye û proseya xebitandina wê ji ya berê aloztir kiriye.
Pirsgirêk ne tenê di hundirê stasyonê de ne; çavkaniyan tekez kirin ku xeta sereke ya di navbera “Elûk” û “El-Hime” de rastî binpêkirinên neqanûnî tê, nemaze di sektora di navbera bajarokê Til Temir û bajarê Serê Kaniyê de. Ev dever pêwîstî bi reformên teknîkî yên berfireh heye berî ku pompekirina avê bi awayekî rastîn ji nû ve dest pê bike.
Di ronahiya berdewamiya qutbûnê de, azara xelkê du qat zêde bûye. Niştecih bi temamî girêdayî tankeran bûne, ku bi sedema bilindbûna nirxê sotemeniyê, buhayê wan jî giran bûye.
Welatiyê bi navê “Ebû Ehmed”, ku karkerê bi roj e û her roj li ser Pira Ezîziyê ji bo peydakirina kar ji bo debara malbata xwe ya ji 9 kesan pêk tê radiweste, dibêje:
”Buhayê depoyek avê (bi kapasîteya pênc bermîlan) di navbera 50 û 60 hezar lîreyan de ye. Ev miqdarek ji kapasîteya min a aborî zêdetir e; ez bi zehmetî dikarim debara jiyana xwe ya rojane dabîn bikim û lêçûna avê, li gel buhabûna jiyanê, bûye barekî giran li ser milên me.”
Ji ber berdewamiya rawestandina sozên pompekirina avê, qeyrana li Hesekê hîn jî dîl di destê xirabkarî û binpêkirinan de ye. Di heman demê de, niştecih berdewam bedêla vê derengmayînê bi debara xwe ya rojane didin. Welatî bangên bilez li rayedarên pêwendîdar dikin ku vê qeyrana mirovî bi dawî bikin.
Raport: Elî Fetah
Ragihandina ENKSê
