Encûmena Xwecihî ya Amûdê ya Encumena Niştîmanî ya Kurdî li Sûriyê civîna xwe ya asayî di roja Çarşemê 1ê Tîrmeha 2026an lidar xist, tê de çendîn mijarên rêxistinî û siyasî gengeşe kirin, ji bilî nirxandina çalakiyên xwecihî di qonaxa borî de.
Civîn bi xêrhatina hemû endamên xwecihiyê ji aliyê serokê xwecihiyê, birêz Ebdulrezaq Hac Qasim ve, dest pê kir û tekez li ser berdewamiya karê rêxistinî bi rihê berpirsiyarî û hevkariyê kir. Piştre amadebûyan deqeyek rêz ji bo giyanê pakê şehîdên gelê Kurd û Kurdistanê bi rêberiya nemir Barzanî û hemû şehîdên azadiyê rawestiyan.
Ji aliyê rêxistinî ve, amadebûyan raporta ku ji Ofîsa Karûbarên Encûmena Xwecihî hatiye wergirtin, nirxandin, naveroka wê gotûbêj kirin, û performansa herêmê di heyama borî de nirxandin, û tekez li ser pêwîstiya pêşdebirina karê rêxistinî, aktîvkirina komîteyan û bihêzkirina peywendiyan bi xelkê bajarê Amûdê re kirin, bi awayekî ku bibe alîkar ji bo xizmetkirina welatiyan û bihêzkirina hebûna Encûmena Niştimanî ya Kurdî di mijarên curbicur ên niştimanî û civakî de.
Ji aliyê siyasî ve, amadebûyan pêşhatên dawî yên li ser meydana Sûriyê, bi taybetî di derbarê pirsa Kurd û çarenivîsa çareseriya siyasî de gotûbêj kirin, û tekez kirin ku her çareseriyeke siyasî ya berfireh divê mafên neteweyî yên rewa yên gelê Kurd, di çarçoveya Sûriyeke nenavendî û demokratîk de, li ser bingeha pirensîpên dadperweriyê û hevbeşiya rast di navbera hemû pêkhateyan de, misoger bike.
Di civînê de her wiha pêşhatên dawî yên di diyaloga kurdî de hatin gotûbêjkirin û li ser daxuyaniya ronîkirina Encûmena Niştimanî ya Kurdî ya derbarê sedemên têkçûna karê Komîteya Hevbeş de rawestiyan, ku amadebûyan tekez kirin ku ev daxuyanî pabendbûna Encûmenê bi zelalmendiya bi raya giştî re, û dilgiraniya wê ya ji bo misogerkirina serkeftina hewlên bi armanca yekxistina refên kurdî bi awayekî ku xizmeta doza Kurd bike, dûrî berjewendîyên teng û destdirêjiyên siyasî.
Di dawiya civînê de, amadebûyan tekezî li ser berdewamiya xebata siyasî û rêxistinî bi rihê berpirsyarî, pabendî bi biryarên saziyên Encûmena Niştimanî ya Kurdî û bihêzkirina peywendiya bi welatiyan re kirin, bi awayekî ku xizmeta berjewendiyên gelê herêmê bike, pêvajoya têkoşîna aştiyane ji bo azadî û demokrasiyê bilind bike û mafên gelê Kurd yên rewa biparêze.
Ragihandina ENKSê
Rapor: Elî Fetah