CIVÎNA FORMA ELCEZÎRÊ YA JI BO AŞTIYA SIVÎL LI QAMIŞLO HAT LIDARXISTIN.
Civîna Foruma Elcezîrê ya ji bo Aştiya Sivîl li Qamişlo hat lidarxistin
Roja şemiyê 31/1/ 2026an li bajarê Qamişlo civîneke girîng di bin navê “Forma Elcezîrê bo Aştiya Sivîl” hat lidarxistin, ku tê de hejmarek ji kesayetiyên siyasî û civakî yên navdar ji pêkhateyên cuda li bakurê rojhilatê Sûriyê hatin cem hev. Civîn bi amadebûna nûnerên Encûmena Niştimanî ya Kurd li Sûriyê hat lidarxistin, ji bilî hejmarek ji çarçoveyên siyasî û çalakiyên civakî yên bibandor li herêmê, di çarçoveya pêşxistina diyalogê û hevkariya hevbeş di navbera aliyên cuda yên Sûriyê de.
Civîn bi axaftineke girîng ji aliyê Şêx Mihemed Ebdulrezaq Elnayif Şêxê Eşîra Teya ya Ereb ve hat vekirin. Şêx Nayif di axaftina xwe de behsa kêşeyên li ser herêmê kir û banga xurtkirina nirxên aştiya sivîl û jiyana hevbeş di navbera hemû pêkhateyên herêma Cizîrê de kir. Herwiha tekezî li ser giringiya yekrêziya di navbera Ereb, Kurd, Suryan û pêkhateyên din de li rûbirûbûna kêşeyên hevbeş kir û tekezî li ser pêwîstiya hevgirtinê li hember pirojeyên ku aramî û asayişa navçeyê dixwezin,bikin armanc kir.
Piştî wê birêz Mihemed Ismaîl Serokê Encûmena Niştimanî ya Kurd li Sûriyê gotarek pêşkêş kir û tê de tekezî li ser giringiya vê forumê kir weke gaveke ber bi xurtkirina diyalogê di navbera hêzên siyasî yên cuda li herêmê. Îsmaîl amaje bi wê yekê kir ku aştiya sivîl tenê bi îradeyeke hevbeş û bi bandor a hemû aliyên pêwendîdar pêkan e. Her wiha bal kişand ser pêwîstiya naskirina mafên rewa yên hemû pêkhateyan li Sûriyê, di nav de mafê beşdariya siyasî û wekheviya maf û erkan.
Ji aliyê xwe ve berpirsê Rêxistina Aşûrî ya Demokratîk birêz Gabriyêl Goriyê axivî û bal kişand ser girîngiya vê civînê di çarçoveya avakirina paşerojeke baştir ji bo hemû gelê Sûriyê. Û bal kişand ser pêwîstiya beşdarbûna hemû pêkhateyan di proseya aştiyê de, û da zanîn ku Aşûriyên Sûriyê tûşî kêşeyên mezin dibin, lê ew tekezî li ser beşdariya çalak di proseya siyasî û civakî de dikin, bi armanca avakirina dewleteke piralî ya demokratîk ku rêzê li mafên her kesî bê cudahî bigire.
Girîngiya civînê û rêgezên wê
Di forumê de ruhê hevkarî û jihevtêgihiştinê di navbera pêkhateyên cuda yên bakurê rojhilatê Sûriyê de hate nîşandan, û bû derfetek ji bo pevguhertina nêrînan li ser riyên pêşxistina aştiya sivîl û pêkve jiyana hevbeş li gorî kêşeyên siyasî û aborî yên ku herêm têre derbas dibe. Hevdîtin her wiha bû bingehek ji bo tekezkirina li ser pêwîstiya hemahengiya di navbera hêzên siyasî de ji bo bidestxistina çareseriyên berfireh ku daxwazên hemû pêkhateyên gelê Sûriyê nîşan bide.
Tevî kêşeyên berdewam ên li herêmê, beşdarên forumê biryardarî û îradeyek xurt nîşan dan ku nirxên diyalog û ji hev têgihiştinê pêş bixin. Eşkere bû ku her kes li ser giringiya yekrêzî û hevkariyê di rûbirûbûna kêşeyên siyasî û civakî de hemfikir in û kar ji bo bihêzkirina aramiya navçeyê û avakirina paşerojeke geş bo nifşên paşerojê dikin.
Di dawiya civînê de, beşdaran tekezî li ser berdewamiya kar bi rêya helwestên hevbeş ji bo pêkanîna aştî û dadperweriyê li Sûriyê kirin, û tekez li ser wê yekê kirin ku pêwîste ev xebat di bin sîwaneke niştimanî ya berfereh de bin ku hemû mezheban têde bin.
Ragihandina ENKSê
Rapor: Elî Fetah
