li Hesekê bîranîna heştemîn ya salvegera şehîdbûna pêşmergeyê qehreman Emgiyan Mistefa Meho hat vejandin.
Li ser vexwendina malbata pakrewan,her du xwecihiyên bajarê Hesekê,yên bi ser ENKSê ve û malbat û xizmên şehîdê Pêşmerge Emgiyan Mistefa Meho (Badînî) li goristana gundê Şema beşdarî merasîma bîranîna heştemîn salvegera şehîdbûna wî bûn.
Merasîm bi deqeyek rêzgirtina ji bo giyanê pakrewanên Kurd û Kurdistanê, şehîd Emgiyan û rêberê nemir Mela Mistefa Barzanî destpê kir.
Piştre birêz Elî Dawid endamê Emîndariya Giştî ya Encûmena Niştimanî ya Kurd li Sûriyê bi navê encûmenê axaftinek pêşkêş kir û tê de behsa wateya pakrewanan û mezinahiya qurbanîdana şehîdan ji bo azadiyê û dadmendiyê de kir.
Herwiha Dawid axaftina xwe bi dawî kir û got:
” Emgiyan pakrewanê hemû Kurdistanê ye û li ser rêbaza Kurdayetiyê ya rêbaza Barzaniyê nemir ji bo bidestxistina dewleta serbixwe ya Kurdistanê ye.
Herwiha Axaftina malbata pakrewan ji aliyê mamê şehîd (Îbrahîm Meho) ve hat pêşkêşkirin û spasiya xwe ji amadebûyan re anî ziman û Encûmena Niştimanî ya Kurdî ji bo beşdarbûna wê di vejandina vê helkeftê de bi taybetî diyar kir.
Herwiha helbestvan Seyfeddîn Qadrî (Şor) jî helbesteke li ser şehîd û şehadetê pêşkêşkir.
Wek tê zanîn pakrewan Emgiyan Mistefa di sala 1992 de, li gundê Şema ji dayik bûye. Dibistana seretayî li gundê Şema, ya navîn û amadeyî li dibistanên bajarê Hesekê xwendiye. Di sala 2009 de tevlî peymangeha Pîşesazî ya Navîn (Beşa Elektrîkê) bû û di sala 2011an de bi dawî kir.
Di 1.4.2013an de, li kampa Benslawa bi qasî du mehan tevlî dewreya kadroyên leşkerî dibe. Di 24ê Cotmeha 2014an de bi nêzîkî pêncî kadroyan tevlî Pêşmerge (Lêşgerê Roj) Û di 7’ê Çileya 2015’an de tevî komek hevalên xwe yên ji Pêşmergeyên Rojava li dibistana El-Xerayic şehîd bû.
Ragihandina ENKSê
Raport:Elî Fetah
