HER DU XWECIHIYÊN HESEKÊ YÊN BI SER “ENKS” VE SERDANA METRANÊN DÊRÊN(KINÎSE) AŞÛRÎ Û SURYANIYAN KIRIN DA KU CEJNA NOELÊ(ZAYINÊ) LI WAN PÎROZ BIKIN.
Îro Pêncşemê,25/12/2025an, şandeke ji her du xwecihiyên Hesekê yê Encûmena Niştimanî ya Kurd li Sûriyê serdana Metran Efram Etnîl Metranê Dêra Aşûrî ya Rojhilat û Metran Josêf Şemhî metranê Dêra Katolîk a Suryaniyan li Cezîrê kir, ji bo pîrozkirina Cejna Noelê(Zayinê) ya bi rûmet.
Di her du serdanan de pîrozbahî hatin guhertin û tekezî li ser kûrahiya peywendiyên dîrokî yên ku pêkhateyên herêma Cizîrê li hev kom dike û giringiya van helkeftên olî ji bo bihêzkirina ruhê hezkirin û pêwendiya di navbera xelkê deverê de, bêyî cudahiya bi pêkhateyên neteweyî û olî ve, hate kirin.
Di hevdîtinê de, her du aliyan tekezî li ser berdewamiya jiyana hevbeş û aştiya sivîl li Sûriyê bi giştî û li parêzgeha Hesekê bi taybetî kirin, ji ber kêşeyên siyasî, civakî û aborî ku welat rastî wan tê.
Ji aliyê xwe ve Metran Efram Etênîl balkişand li ser wê yekê ku rêveberiya Sûriyê û herêmê bi yek reng nayê kirin û tekez kir ku piralîbûn û rêzgirtina taybetiyên neteweyî û olî bingeha her aramiyek rasteqîne û paşerojeke ewle ye ji bo hemû gelê Sûriyê.
Ev serdan di çarçoveya bihêzkirina girêdanên biratî û jihevtêgihiştinê di navbera pêkhateyên cuda yên civakê de, û tekezî li ser rola diyalog û hevgirtinê di bihêzkirina nirxên jiyana hevbeş û parastina pêkhateya civakî li herêma Hesekê û Sûriyê bi giştî tê kirin.
Ragihandina ENKSê
Rapor:Elî Fetah