Îro Sêşemê 29.8.2023,an Nûneratiya Herêma Kurdistanê ya Encûmena Niştimanî ya Kurd li Sûriyê li baregeha xwe ya li Hewlêrê, paytexta Herêma Kurdistanê, civîna xwe ya asayî lidar xist.
Civînê bi kêlîkek bêdeng li ser giyanê pakrewanên Kurd û Kurdistanê û di pêşî de giyanê nemir mela Mistefa Barzanî û nemir Îdrîs Barzanî dest pê kir.
Piştî tesdîqkirina amadebûn û neamadebûnan û bi amadebûna piraniya endamên nûneratiyê, pêşnûmeya rêziknameya ku ji endaman re hatibû pêşniyarkirin hat xwendin û gotûbêj kirin û hat pesendkirin.
Herwiha ji bo pêşxistina xebatên nûnertiyê di çarçoveya aktîfkirina xebatên sazîbûnê de komîte hatin avakirin û erkên her komîteyekê hatin diyarkirin.
Herwiha di civînê de endamên nûneratiyê behsa pirsgirêk û arîşe û kêşeyên ku rûbirûyê gelê me yê penaber li Herêma Kurdistanê bûne, kirin.Û bi rêya komîteyên xwe yên avakirî bi rayedarên pêwendîdar re bişopînin da ku wan çareser bikin.
Di dawiya civînê de, pêşhatên siyasî yên dawî li Sûriyê bi giştî û li navçeyên Kurdistanî bi taybetî hatin gotûbêjkirin.
Ragihandina ENKSê
Raport:Elî Fetah
